7 月
兩代相傳 – 80後線面姊弟
縱使近年有美容院推出古法線面服務，但相對日新月異的美容儀器，懂得欣賞這門手藝的人，仍佔少數，香港的古法線面師更是少之又少，但今年 25歲的阿珊及 23歲的弟弟成坤，卻不怕辛苦，願意繼承母業，執起麻線替客人線盡身上毛髮，令這個傳統得以承傳下去。
採訪當日為星期四中午時分，記者一踏進上環某大廈單位內，已見有 2位客人在輪候線面，線面師梁太正忙於工作，一邊線面、一邊招呼記者，「你等一陣，做埋呢 2個客先同你傾偈。」記者正想坐下，竟然又有客人到來，令記者有點吃驚，皆因從沒試過線面的記者，一直以為這個行業將近沒落，兼少人幫襯，看到店內平日也如此多客，怎能不意外。
等候期間，看到店內寫着線面的功效，除了可以去除面毛及體毛外，原來還可以美白去印、減少黑頭等，「係呀，線面可以線咗啲黑頭、酒米，同埋線得多， 啲毛會愈少同幼，同做激光功效差唔多，但安全好多。」講到咁多功效，連記者都心郁郁，但又擔心會很疼痛，「唔驚，如果你冇特別拔過或者剃過啲毛，就唔會好痛，你可以先試線唇毛先，阿囡，你嚟線啦！」
梁氏一家相處融洽，梁太與仔女幫客線面，梁先生亦會留在店內幫手，相中貓貓是他們寵物「肥寶」。 
採訪當日已是閒日，一個小時已有 5、 6位客人，令梁太和成坤忙個不停。
母女拍檔一齊線面
想不到其囡囡阿珊也是線面師，而且只得 25歲，見記者一面懷疑，阿珊笑言：「你唔使擔心，我十幾歲開始幫人線面，線 咗好多年。」她先替記者拍上海棠粉，口咬着麻線，雙手拉着線兩端，用線拔去記者唇毛，手法極之純熟，不消一會便完成，難得痛楚極輕微，再照鏡，嘴唇附近皮膚真的變得較白，「都話唔痛㗎喇。」
年輕的阿珊坦言肯做線面師，是由生活環境迫成。梁氏一家是新會人，十多年前移居香港，因為搵工難，梁太才開始做線面，「我婆婆識得線面，以前 喺大陸唔會用 嚟賺錢，只係免費幫鄰居做，媽咪亦都一樣，後來 嚟到香港，先至用 嚟賺錢。」
見媽咪賺錢辛苦，阿珊 13歲自學線面，希望幫輕媽咪，「我細細個睇媽咪線面，睇得多已經識得個手法，跟住我自己線對腳做練習。」試了幾次，掌握到技巧，阿珊膽粗粗接客。「媽咪一對手，好難做到咁多客，有時 7、 8個人排隊等，真係要等幾個鐘，所以我話幫佢 哋線，佢 哋都肯，同埋我線完，媽咪會再幫我執。」
由朝線到晚冇停手
13歲開始兼職線面，到 21歲中學畢業，便正式投入工作，「我讀書唔叻，線面都係一門手藝，而且我 哋 啲客好多，所以決定做線面師。」客人的確多，每日至少有 15至 20個客，遇 着旺季或假期前，試過多達三十多個客，由朝到晚做不停。「試過由早上 10點，不停線到夜晚 8、 9點，連飯都冇時間食。」
有不少客人除了線面外，更愛線手腳、背部、腋下，甚至是比堅尼位，收費由$110至$400不等，一般線面約要半小時，全手或全腳則要 1個小時。「好在我哋做嘢嗰陣會戴住口罩，避免個鼻吸入粉之餘，亦唔會聞到客人嘅體味，不過最初幫客線比堅尼位都幾尷尬，反而 啲客冇所謂，慢慢線得多，已經慣晒。同埋好多客人要求線全身，我 哋兩個人，一人做一邊，都要線足 5個鐘，真係好攰。」若果客人曾經剃毛，就更難線，「剃毛剃得多， 啲毛囊會塞住，要挑開個毛囊先線得，要花多 啲時間同精神。」
因為媒體報道，她們的客人來自不同國籍，西方、印度及日本皆有，「日本遊客最多，可能之前有日本雜誌 嚟採訪過，同埋有日本網站登過我 哋 嘅資料。」在眾多客人中，以西方客最怕痛，「試過幫個鬼妹線面，線 咗個幾鐘，因為佢線幾下就嗌痛，要停低休息一陣再線；又試過有個鬼婆痛到喊，線到一半唔肯再線。」
客人藍小姐
我幫襯 咗 10年，最初因為生暗瘡， 啲印去唔到，聽人講線面有助去印，咪 嚟試，覺得效果幾好，所以一路 keep住做，家每個月會 嚟 1次。
男性小朋友客都有
男性客原來也不少，佔了 2成生意，主要線眉和額頭位置，至於客人年齡， 4至 80歲都有。「有 啲大人好迷信，會帶 啲小朋友 嚟線面，例如線 咗兩眉之間 嘅雜毛，話會令小朋友聰明 啲。」
客人之多，母女倆應付不來，連堂堂男子漢的兩個弟弟也學起線面，採訪當日 23歲大仔成坤便與梁太，合力替客人線面及手，成坤說：「我 3年前同弟弟開始學線面，冇辦法，屋企家境唔好，想幫吓媽咪手。」為訓練囝囝，梁太帶他們回鄉下，做了 1個月實習，免費替同鄉線面，「 嗰個月， 1日線足 8、 9個鐘，線到熟手為止。」
作為男線面師，女性客會否很抗拒？「我自己唔會尷尬，因為細細個已經睇住媽咪幫人線面，同埋冇乜身體接觸，不過開頭有啲客都會尷尬，咁我會先幫佢 哋線手，等佢 哋慣 咗，先再幫佢 哋線面。」梁太亦在旁插口：「好多客指定要搵佢，因為佢識得用陰力，反而線得冇咁痛。」
囝囝囡囡均有夢想
剛讀完 A-level的成坤，只是在課餘間中幫手，將來亦不會加入此行業，「細佬仲讀緊書，而我今年會去瑞士讀酒店，第時想做酒店或者係 event management，將來返 嚟，得閒先會再落場幫手。」
成坤有自己的理想，其實阿珊亦一樣，夢想做一位化妝師，「我好鍾意幫人扮靚，同埋做 咗線面，發現唔少客人都係準新娘，覺得線面同化妝可以做一條龍服務，婚前幫個客線面，到結婚當日幫埋佢化妝，所以年幾前讀 咗 啲化妝課程，家都有接化妝生意。」
縱然夢想實現，但阿珊不會放棄線面，「我 哋有唔少熟客，生意唔錯，只計自己，月入都有萬多元。加上香港 嘅線面師唔多，就算 啲美容院做線面，始終冇咁熟手，競爭唔算大。」線面不但養活了他們一家 5口，更是一門專業手藝，又怎能輕言放棄。
線面 step
- 先在線面位置拍上海棠粉。
- 使用麻線線面。
- 完成後，使用濕絲巾抹乾淨面，若有敏感者則會塗上防敏感霜。
點入行？
現時有不少美容院及美容課程會教授古法線面，梁太指線面易學難精，「要學個手法唔難，但要做得純熟，就要多 啲練習，識得用陰力，否則會線到客人好痛。」她表示亦曾有人要求學師，但她因為工作太忙而無意收徒，「我每日有好多客，做都做唔切，同埋我有仔女幫手，所以冇諗過收徒，不過家有 啲美容課程都有教線面，有興趣 嘅人可以去學。」
後記：牙骱軟
線面好講牙力，手只是移動位置及夾住毛髮，拔毛的力度全在牙齒，「有 啲客體毛粗，要好用力逐條拔出 嚟，線幾個鐘，牙骱會好痛，仲有膊頭、手腕都會痠痛。」以前痛得厲害，阿珊要每星期做按摩，非常辛苦，「後來媽咪教我每晚浸熱水，令全身輕鬆 啲，紓緩 咗痛楚，家先唔使個個星期去按摩。」每行都會有職業病，像記者會腰骨痛一樣，賺錢，從來不容易。
文章來自：壹週 Plus – 兩代相傳 – 80後線面姊弟
上環梁太線面專門店 (美之選)
門店資料
地址：香港上環德輔道西 25 號德輔大厦 8 樓 4 室
電話：2546 1158
Whatsapp / 手提：9410 7218
營業時間：星期一至星期六 10am-8pm
※建議先電話或 Whatsapp 預約
